Bertsio Gaua Beasaingo Gaztetxean (Spurium Revival)

Egia esan, ez dut uste sekula eszenatoki baten gainean hain ondo pasa dudanik. Bost urte pasa dira (azkar esaten da…) azken aldiz Spurium eszenatoki batera igo zenetik eta Beasaingo Gaztetxeko 2008 Bertsio Gaua aukera ederra iruditu zitzaigun oroitzapen zaharrei forma berriak emateko.

Zortzi bat talde igo ziren taulara atzokoan, Nazka Naranja, Alopecia Genital, En un parque madrileño se me pone como un leño, Residuos Sistematicos, Igor Alustiza & The Surfing Secretas eta Spurium beste batzuen artean. Talde gehienak herriko gazteen artean bertsio gauerako espreski sortuak izaten dira eta honek bizi berezi bat ematen dio gauari.

Giro ederra izan genuen gau osoan zehar eta urtero gau honetan ohitura den bezala, humorea eta musika antzeko kopuruan izan genituen. Denetik entzun genuen gaueko hamaiketatik goizeko bostak arte iraun zuen makrokontzertuan; Pixies, Metallica, Hell Beer Boys, Batman, Judas Priest, Motorhead,  Ramones eta une honetan ihes egiten didaten beste mila talde.

Guk gure aldetik, Reefen Place Your Hands, O’Funk’illoren Riñones al Jerez eta Wolfmotherren The Joker & The Thief jo genituen. Horretaz gain, Spurium garaian jotzen genuen introa, “Cuando me voy de Farra” mitikoa (zerbait esateagatik) eta gure saioa amaitu zuen San Miguel ineditoa jo genituen.

Ederki egin dut lo eta errekuperatu naiz baina hala ere, emozioak muturrean ditut oraindik. Atzoko gaua bezalakoei esker gogoratzen dut zertarako ibili ginen sei urteetan zehar astean hiru aldiz entsailatzen eta asteburuetarako kontzertuak bilatu eta bilatzen. Zahartzen hasi garenaren seinale izango da agian baina nostalgiko jartzen hasia naiz...

Ederra izan da bost urte beranduago lagun talde berebera eszenatoki gainean ikustea, helduago, beste bizi batekin, beste eginbehar batzuekin baina beti bezain lagun. Igor, Imanol, Eski, Rami eta Alvariño berriz ere hotsa egiten… Ez dut zalantzarik, sekula ez dut eszenatoki batean hain ederki pasatu. Hurrenarte behinipein…

Spurium: Maketarako 1999an ateratako argazkia