Behin baino gehiagotan komentatu dut zenbat maite dudan Ian McEwan idazle britainiarra. Gaur, bi berri pozgarri irakurri ditut berari buruz. Bata, Atonement bere nobelaren adaptazioa laster izango dela gure pantailetan. Bestea, bere azken lanaren (On Chesil Beach eleberria) ehun mila ale saldu dituela Erresuma Batuan, bi aste eskasetan.
Nik Sua Falta Zaigu liburuaren lau ale saldu eta sinatu nituen atzo, Donostian, liburuaren eguna zela eta.
Beraz, pentsa daiteke, salmenta zifrek eta kalitate literarioak bat egingo balute (eta McEwanen kasuan horrela delakoan nago) britainiarra ni baino 25.000 aldiz idazle hobeagoa dela. Hori horrela ote?
Ez ba, gauzak ez dira hain sinpleak. Izan ere, ezer baino lehen argitu beharko nuke lau ale horiek nori saldu nizkion: 1) lagun min bati, 2) ahizparen mutil-lagunari, 3) aspaldian ikusten ez nuen goierritar-saharaui bati eta 4) aitari. Beraz, agian kalkulua zorroztu eta McEwan ni baino 50.000 aldiz idazle hobeagoa dela esan beharko nuke.
Ez pentsa txiki sentiarazten nauela horrek. McEwan nire idazle gogokoena izanda nola irudituko zait gutxi bera baino 50.000 maila beherago egotea. Azken finean, gauzak horrela ikusteak McEwan eta biok eskailera berean ikustea ahalbidetzen dit. Bera punta-puntan, ni zuloan. Baina eskailera berean. Eta harro-harro nago, hemen, Atonement filmearen trailerra ikusten eta lau irakurle berri horiek gogoan.
Comments
Tira, familikoek eta lagunek behintzat liburua erosten badute, gaitz erdi. Jakin izan banu sinatuta saltzen zirela, niretzat bosgarren alea!
Posted by: Aitor.2007/04/24 23:07:8.717000 GMT+2
Posted by: Solasturi.2007/04/25 10:47:40.305000 GMT+2
http://www.blogak.com/solasturi
Ba nik beste egunean El Correon, euskarazko liburuen salmenten zerrendan lehen postuan ikusi nuen zure liurua. Ez dira hain gaizki joango salmentak orduan...Sorte on Katixa edo, behintzat idazle onena izan.
Gabon.
Posted by: eneko.2007/04/25 23:26:34.931000 GMT+2
http://www.fotolog.com/ekintana
Nik jakin nahiko nuke nun kristo utzi nuen zure liburua, nere ilobari utzi ote nion azkenean, edo ze apalaren atzean erori zaidan, irrikitan bainago atzera irakurtzeko.
Posted by: Patxi.2007/04/26 01:01:52.845000 GMT+2
http://patxitrapero.blogspot.com
Eta zuk, Eneko? Erosi al duzu? Badakizu baliospeneko azterketan galdera sorpresa egongo dela, ezta? ;-)
Patxi, ez baduzu topatzen beste bat oparituko dizut.
Muxu bana
Posted by: katixa.2007/04/26 18:55:37.159000 GMT+2