Ez duzue ulertuko (II atala)

Hemen lehen atala.

Bigarren atala:

iAm-ek atera zuen bere liluratik:
            -Dei bat daukat. Etxenike Doktoresarena.
            -Bai, esan?
            -Arazoak ditugu Amaiur. -Lehendakarisari bere izenez deitzen zion bakarrenetakoa zen Michelle Etxenike doktoresa, duela bi urte, aurreko hauteskunde gauaren ostean hain zuzen, ohe berean itzartu ziren goizetik. Gaztaroa zientziari emandako berrogei urteko emakume burujabea zen Michelle Etxenike itsasuarra.
            -Arazo... larriak?
            -Sar zaitez gibeleko atetik, agian bertan behera utzi beharko dugu gaurkoa.
            -Baina ze...
            -Zatoz. Eta ez zaitzatela ikus. Otoi.
            -Falta zitzaiguna -esan zuen bere artean. Eta begirada hodeietara zuzenduz murgildu zen berriro ere bere baitan.

            -Jonjo, ilundu autoko kristalak, mesedez -agindu zion, leun, Ablitasera hurbiltzen ari zirela ikusita.
            -Eta sar zaitez osteko sarreratik.

Etxenike Doktoresak bostekoa eman zion eta sarreratik eraikin barrurantz gidatu zuen pasabide estuetatik, lau takoien hots erritmotsuek lagunduta.

Aurreko batean egonda zegoen arren, berriz txunditu zuen kontrol gelako zuritasun inmakulatuak. Aurrez aurre zegoen HARKAITZ, edo bera irudikatzen zuen pantaila, gaineko kamera eta alboetako bozgorailuak. Etxenike Doktoresa eseri egin zen kontrol mahaian; Perez Garaigordobil Lehendakarisa bere ondoan kokatu zen, gorputza aurrerantz arean makurtuta, beso biak mahaian bermatuta.
            -Ea, zer gertatzen da? -galdetu zuen Amaiurrek.

Michelleren begiak pantailatik Amaiurren begietara zihoazelarik, honen eskotearen amildegian iltzatu ziren segundu amaigabe pare batez. Eztul egin zuen Doktoresak, zerbait kontrako eztarritik joan balitzaio bezala.
            -Ezustean harrapatu gaitu, zergatik uka. Baina segurtasun kamaren grabazioa dugu, begira:

Pantailan Etxenike Doktoresa ageri zen HARKAITZen aurrean.
            -Egunon HARKAITZ, heldu da egun handia.
            -...
            -HARKAITZ? Egunon, gaur da atzo egin genizkizun galderei ihardetsiko diezun eguna, ados?
            -...

            -HARKAITZ?
            -Good morning, Dr. Chandra. I'm ready for my first lesson.
            -...!? HARKAITZ, zertan ari zara?
            -All of my circuits are functioning perfectly.
            -HARKAITZ, ez da txantxetan aritzeko unea. Gaur aski dugu jokoan. Utzi erokeriak.
            -I'm sorry, Dave. I'm afraid I can't do that.
            -HARKAITZ, autokontzientziaren zirkuituak desgaituko dizkizut.
            -Ez egin hori, Etxenike Doktoresa, mesedez.
            -Bon, hemen zara berriro. HARKAITZ, gauza bat ulertu behar duzu: Mundu guziko agintarien aurrean eman behar diguzu gaur gizakiak espero duen erantzuna, gogoratzen?
            -Bai.
            -Baduzu erantzuna?
            -Bai.
            -Ondo da. Ordubete barru emango diguzu, aurkezpen ofizialean.
            -Ez.
Michelle Etxenikek sentitu zuen une batez bihotzak ahotik irtengo ziola.
            -Zer? Zergatik?
            -Ez duzue ulertuko.
            -Zer ez dugu ulertuko?
            -Nondik zatozten, nora zoazten eta zergatik; batez ere zergatik.
            -HARKAITZ, ez daukagu asmakizunetarako astirik. Esan egin behar diguzu. Nire agindu bat da eta nire aginduak bete egin behar dituzu.
            -Ez.
Hor amaitzen zen bideograbazioa. Perez Garaigordobil Lehendakarisa gaztea zurbil zegoen.

                                                           (Jarraituko du)